आरेवाडी हे गाव श्री बिरोबा देवाच्या प्राचीन मंदिरासाठी प्रसिद्ध आहे. हे एक जागृत देवस्थान मानले जाते आणि महाराष्ट्र, कर्नाटक आणि आंध्र प्रदेशातून लाखो भाविक दर्शनासाठी येतात. दरवर्षी येथे मोठी यात्रा भरते, जी या भागातील सर्वात मोठ्या उत्सवांपैकी एक आहे.

श्री बिरोबा देवस्थान ट्रस्ट मंदिराचे व्यवस्थापन पाहते आणि भाविकांसाठी विविध सोयीसुविधा उपलब्ध करून देते.

‘सुंबरान मांडिलं’ म्हणत ओव्यांतून श्री बिरोबा देवाची आख्यान गायली जातात

दक्षयज्ञाच्या वेळी शंकराचा अपमान झाल्याने दाक्षायणीने म्हणजेच पार्वतीने आत्मदहन केले. त्यामुळे क्रोधित झालेल्या शंकराने जटा आपटल्या व त्यातून वीरभद्राचा जन्म झाला. वीरभद्राने दक्षाचे धड उडवले. त्यावेळी दक्षपत्नीने वीरभद्राची करुणा भाकली. आपल्या पतीस जिवंत करावे, अशी याचना तिने केली. त्यास जिवंत कसे करावे याचा विचार करीत असताना वीरभद्रास जवळच मेंढ्या चारीत असलेला धनगर दिसला. त्याने मेंढीचे शिर दक्षाच्या धडास लावण्याचे ठरवले. त्यावेळी धनगराने वीरभद्राची प्रार्थना केली कि, "आपण आमच्या कुळात अवतार घ्यावा व शिवनिंदक व दुष्टांचा संहार करावा". तेव्हा वीरभद्राने त्यास सांगितले की कलीयुगात मी धनगरकुलात जन्म घेईन. पुढे नारदपुरातील राजा ध्रुवाइत याची कन्या गंगासूरवंती (गंगा–सरस्वती) हिच्या पोटी वीरभद्र म्हणजेच बिरदेवाने जन्म घेतला. मात्र तो पुत्र मातेजवळ राहू शकला नाही.नदीच्या शापामुळे त्याला वनात एका पाळण्यात घालून ठेवावे लागले. तेथे एकव्वा आणि तिच्या धाकट्या बहिणीने त्या बाळाला आपला भाऊ मानले व चिंचली येथे नेऊन त्याचा सांभाळ केला. पुढे काही वर्षांनी बिरोबाचे लग्न झाले, पण देव संसारात रमला नाही. देवाने तपश्चर्या केली व विठ्ठलाला भावाच्या रूपात बोलावले व त्रास देणाऱ्या दैत्यांचा या दोघांनी मिळून नाश केला.